«Օրերս մենք գրել էինք, որ Հրազդան քաղաքի ավագանու 2014թ. դեկտեմբերի 25-ի արտահերթ նիստով քաղաքի բյուջեում փոփոխություններ են կատարվել որոշվել է Հրազդանի քաղաքապետի աշխատավարձը դարձնել 500 հազար դրամ, իսկ աշխատողներինը բարձրացնել 10-20 հազար դրամով:

Այդ կապակցությամբ մենք փորձեցինք պարզել, թե ինչքան են ստանում Հայաստանի մյուս քաղաքապետերը: Այսպես, Գյումրու (որ Հայաստանի երկրորդ քաղաքն է) քաղաքապետ Սամվել Բալասանյանի աշխատավարձը 300 հազար դրամ է:

Իսկ սույն քաղաքապետարանի ֆինանսական բաժնից հայտնեցին, որ արդեն 2 տարի է՝ քաղաքապետն աշխատավարձ չի ստանում, այն փոխանցում են տարբեր բարեգործական ընկերությունների: Արարատի քաղաքապետի աշխատավարձը 260 հազար դրամ է, Եղվարդինը՝ 300 հազար, Աբովյանինը՝ 267 հազար, Չարենցավանինը՝ 206 հազար, Ծաղկաձորինը՝ 230 հազար, Սևանինը՝ 200 հազար դրամ:

Իսկ Աշտարակի քաղաքապետի աշխատավարձը «պետական գաղտնիք» է. քաղաքապետարանից հրաժարվեցին ասել անգամ գրավոր հարցում ուղարկելուց հետո: Ամեն դեպքում, կարող ենք արձանագրել, որ Հրազդանի քաղաքապետն ստանում է ամենաբարձր աշխատավարձը: Բնականաբար, Երևանի քաղաքապետից հետո, որի աշխատավարձը 575 հազար դրամ է»,–գրում է թերթը։

Մանրամասները՝ թերթի այսօրվա համարում։